Data: xullo de 2021
Editoral
Tes nas túas mans o primeiro número do voceiro do Movemento Arredista. Con esta ferramenta queremos intervir no noso pobo e particularmente entre a base social do soberanismo galego, co obxectivo de ofrecer unha análise da realidade desde posicións abertamente independentistas, que aposten pola construción do socialismo e asuman consecuentemente o feminismo.
Ademais desta versión impresa, contaremos tamén con unha versión dixital en enmovemento.arredista.gal, que se actualizará con máis periodicidade. Tanto alí como aquí queremos recoller tanto análises de coxuntura como artigos de opinión, entrevistas… que nos permitan entender a sociedade na que vivemos e construir mellores ferramentas para transformala.
A nosa é unha organización nova, que ocupa un espazo político que considearmos máis necesario que nunca e que xa conta unha traxectoria e unha bagaxe que, humildemente, reivindicamos.
Estamos convencidas de que non é tempo de dar pasos atrás nin de renuncias, e que o que realmente nos esixen o pragmatismo ou o realismo que tantas veces se invoca na política é sermos radicais, para poder cuestionar de raiz unha realidade cada vez máis opresiva. Poucas cousas hai máis utópicas que pretender reformar o irreformábel, ou pretender que problemas estruturais e sistémicos poden solucionarse con respostas superficiais.
En tempos de desmobilización e promoción do individualismo, de inmediatez e de posibilismo, queremos reivindicar a vixencia do compromiso militante, dos procesos de construción colectiva, do debate estratéxico, da organización desde a base e do traballo de longo alento.
Desde eses principios queremos seguir sumando forzas e ideas en todos os ámbitos, a única garantía de enfrentar con garantías as batallas que virán.
Organicémonos!
Ler online:
