Data: xullo de 2022
Editoral
Este segundo número do noso voceiro nacional sae á rúa nun momento de rápida degradación nas condicións de vida da nosa clase.
Este contexto hostil demanda análises adecuadas que avalíen as dimensións e causas desta nova crise, mais sobre todo esixe propostas para superala en favor da maioría social e unha práctica política encamiñada a ese obxectivo.
Para iso, contarmos con ferramentas organizativas adecuadas é a tarefa máis urxente que temos por diante, e á que debemos adicar máis esforzos nos próximos meses. Cómpre reverter a tendencia ao individualismo e a desmobilización que arrastramos nos últimos tempos para reagrupar forzas de cara a unha batalla contra os intereses do capital, que está a arreciar a súa ofensiva contra o pobo.
Desde o Movemento Arredista seguimos traballando por construir e reforzar un espazo político que, sempre con vocación unitaria, interveña no movemento popular desde posicións revolucionarias. Chamando ás cousas polo seu nome e sen medo de dicir a verdade: non hai solucións sinxelas aos problemas que enfrontamos, e estas non poderán vir exclusivamente das dinámicas electorais, de estratexias comunicativas ou de liderados máis ou menos brillantes.
As receitas que temos para ofrecer son vellas mais son as únicas que ao longo da historia teñen dado resultados: militancia, solidariedade, compromiso, organización e mobilización son as chaves que até hoxe nos permitiron avanzar e as mesmas que precisamos impulsar para comezar a mudar esta desfavorábel correlación de forzas.
Nesta publicación analizamos diferentes cuestións que, co foco posto tanto no cenario nacional como no internacional, pretenden contribuir ás tarefas de análise, formación e debate que axuden á reorganización e á ofensiva que a nosa clase debe lanzar para comezar non só a recuperar dereitos, mais sobre todo a imaxinar e crear formas de vida libres de toda opresión.
Organicémonos!
